انتى يا وضوح المعانى ياارهصات البشارة
صاحى فى ليل الخريف
ولما القاك مطر
اغنى بفرح السنابل
وبلحن العصافير
اقيف قدام رموشك الجميلة
عايز اسكن عيونك ارتاح
اصرخ بحبك يا وضوح المعانى
ياارهصات البشارة
يافجر الكلام الزين
ياصمت التامل فى فى زمن صاخب فوضوى
ضاعت فيهو الاناشيد
ضاعت الفكرة
يافكرة زى النشيد
يا غنوة بتصادم فى الاصنام القبيحة
المعجونة زيف
مالية الشوارع والمنابر والميادين
مسخت ملامح الامكنة
لوثت جمال الزمن المثالى
شوهت ثوابت المعتقد
ردت ناس لجهات تانية
انتى يافوح الياسمين
تعالى درب نشتل فيهو شجرة
يدى فى يديك نعمل للطير عشة
وللحلم مرجيحة
نغسل خرافة الزمن القبيح
نعرى الكذبة الكبيرة
نأسس صدق الوعد
نعانق الامنية
وابقى فى حضنك انا والفرحة الجميلة
وتبقى فى حضنى انتى والفرحة
يدفينا الحب
نصابح بكره بشفع
نحجيهم كان كان يا ما كان
نغنى ليهم ترهاقة بعانخى
نبتة وكوش وكمان علوة
ويبقى سقف الامانى الغيم
ونلون الجدران بالوضوح
ونفتح الشبابيك لكل الجهات
وانا وانتى نقول النشيد
نقول الغنى
ياخريف امشى وتعال
تلقنا سنبلة ونلقاك خير
تلقنا حب ونلقاك فرحة
0 comments:
إرسال تعليق