معليش ما اقدر افرح فى زكرى يوم مروق الانجليز القالوا عليهوا استقلال
مرقوا وسابو هموم وهموم
اه ياوطنى الشايل همك وحدك والوجع الفيك متكدس والسرطان العشش فى كبدك
مادى لسانوا الاوسخ من الفضلات
الما سالم منو حد
فرز الناس قبائل وبيوت والوان وشلوخ عكس ما جابم الله
وباسم الله الاصبح سلعة فى مزاد الزيف الكيزانى سرقوا
ونهبوا اغتصبوا وكتلوا وذلوا الناس الكل
اه ياوطنى الشايل همك وحدك والقبح الفيك اتمدد
فارش فيك رزيلة وكذبا لاوى عنق الحق الباين
كاسر رقبة وعامل دفن الليل اب كراعا برا
وراقص وطالق دقنو الزايفة
اه ياوطنى ما كان استقلال فى 56 كان استغلال
فات مستر ولسن وجاءك الماعرف كيف يبنيك اكيد
طائفية ملكية رجعية وما عارف ايه نخبوية
ماعرفت كيف تمزج بين النخلة والابنوس
ماقدرت ترسم فيك ملامح الالفة
ولاتستثمر فيك وقتا من صدق وصفاء نية
دى خلق فيك الازمة عميقة لا ازمات
وكبرت فيك الفجوات الصارخة وقعدت كسيح
ما قادر تلحق القاموا بعدك فاتوك فى محطة 56
اللسا فى جدل طائفية نخبوية اسلا موية عروبة
عسكرية زندية اقصائية تكفيرية ومافى واحد فيهم قال سودانية
مشروع نخبوى فصل للناس هوية وتوجه غصب واقع الحال
وكمان اكل العيش واسطات وجهات وولاءت ما كفاءت
اه يا وطنى الشايل همك وحدك خلوك كسيح ما قادر تنهض
تلحق القاموا بعدك فاتوك لدقون زايفة جابوها عسكر
وانهزامية الطائفية والمنظراتيه واحزابك الكرتونية
كرست فيك حوار الرصاص والعنف ولعت فيك نيران
حرقت فيك هشاشة سلامك الاجتماعى
وكرست فيك العوج اشكال وقالوا هى لله
نهب لله
كذب لله
اغتصاب لله
هى لله
لا للسلطة
ولا للجاه
الله يلعنكم
ويعلقكم فى مسامير الغضب المنصوبة
فى شوارع المدن الجايعة انتو وكل من والاءكم
اه ياوطنى الشايل همك وحدك
ابدا ماكان استقلال فى 56
كان استغلال للناس والخير الفيك
تخمت جيوب وبنوك اجنبية
وبيوتات
والجوع فيك مساحة كبيرة
والفقر مشرور فى كل ساحاتك
كلهم مسؤلين عن حالك دى الشين
من ناس 56 وكل الحكموا وراهم
لعند الطامة الحسى الاقبح مافى المشهد
ربى يجيب الاستقلال وتبقى سودانية وبس
0 comments:
إرسال تعليق