اطلعى من صف الغاز الممتد مدن تعبا زايد فى المحنة
الفى ضهر الاغبش الواقف بأخر فقرة يعأفر
الغاز المعدوم بأمر افكارا
قذرة وجشع كرشا
منفوخة بساحق وماحق
تتنفس ريحا نتنه تزكم كل انوف خلق الله
وتزيد وتحشى فى الكرش الما بتشبع
تتمط زى خرج السقا
اطلعى صرخة تخاطب عرش الطاغوت
بكل جراءة
تهز بصداها اركان العبث الفوضى
كفاية مهازل كفاية مزلة
تصحى الهمة الهمدت برهة داخل الاغبش
المغلوب جوعا مكسور ضهرو بفعل السوق
الشيطانى
عشان بباقى النخوة يسند ضهرو المكسورعلى
حيط الامل المنصوب فى داخلو البغلى
من عمايل الكيزان تجار الدين
وزلهم للناس الصابرة وبقلة ادبا وغرور
ينبذو فى الخلق ويقولوا
علمناكم اكل الهوت دوغ والبيتزا
ياشذاذ الافاق الحسو كوعكم من غير مجمجة
دى اساليب حكام البلد الاصبح هامل
فعلا اصبح هامل ما ليها وجيع
ويرفع صرخة
تجلل تشعل نارا تحرق دقنا
وكل دقون الزيف الواقفة فى كل حته
وتخمش فى الخير مخلوعة زى المنشار
طالع ماكل نازل ماكل
ويلملم حتى فتاتا متساقط ويكنز فيهو ضرا
لعند ما يخرب يبوظ وما ينفع حتى علوق للزاملة
بس حسدا وكيتن فى الما لاقي لقيمة
تسد الرمق الادنى
ويجيك يمسح فى كرشو وطالق دقنو
ويقول قال الله وقال رسول الله
الله يسقط حجرك ويطرشق كرشك المليانة سحت يا دجال
حرامى حمير ما عندو ضمير او زرة مبداء عملوه عميد
واركان حرب كمان
فالحين فى تجميل القبح سموهم دعم سريع وحرس حدود ومش عارف ايه
لكن عند العامة معروفين بالجان جويد
كمان قالو جهاز للامن الوطنى
ودى كمان لامى فاقد اخلاقى وممكن مجهولين والدين
لانو اعمالهم ماحقت اولاد ناس
سعرانين حاقدين ع الخلق
يمارسو كل انواع البطش بالشرفاء
ويكتموا كل كلمة حق بابشع صورة
ناسين انو دوام الحال ما مضمون
والاخلاق فى شرعهم مافى والانسانية تفاهة
وديل عند العامة معروفين بكلاب الامن
جبتوهم حماية للعرش الساسو نفاق
الما بنفع فيهو حراسة
وحتما فى اول مطر يتشلع زى قصر الرملة
ما اضيق نظرتكم يا كيزان
وما اضحل تفكيركم
لو دامت للقبلك ما كان وصلت لعندك
اطلعى من وجع السوق الشيطانى
نسمة ترش فى الروح الامل المفقود
بخلاص من تجار الدين
وتأسيس للصاح
المحمى بوعى متنامى
يهزم كل الفوضى
وكل اشكال التنظير العبثى
الما يردم حفرة صغيرة
خليك من بنيان امة
0 comments:
إرسال تعليق