تفاصيل الحصل لي يوم الخميس الموافق 17 يناير

كتبت Asil Abdo

زي ماكلنا عارفين يوم الخميس كانت دعوة تجمع المهنيين لتسيير موكب من شارع القصر للقصر الجمهورى وانا من يوم 19 ديسمبر كنت حريصة ع انى اكون في كل المواكب
فعلا مشينا وللاسف كان في قمع شديييييد من قولة تيت اتضربنا بونبان تقيل ودورت الاعتقالات من طرف وبدينا نتفرق وكل مانحاول نتجمع يحصل قمع اذيد
ف النهاية بدينا نتصل ع اصحابنا ونشوف حنتجمع كيف فسمعنا انو الناس اتجمعت في برى الدرايسة وكان طوالي تحركنا لهناك عشان ندعم الناس
اول ماوصلنا لقينا الكجر بضربو في البونبان وحبة حبة لمن قدرنا وصلنا ميدان الدرايسة وكان الحشد المهيب، تقريبا كل زول جمعنى بيهو شغل او حتي شارع ساي كان موجود هناك، حرفيا الميدان كان مليان لدرجة جسمك يقشعر واصوات الهتافات تشق السحاب
وكالمعتاد بدو يضربو في الحشود بونبان من بعيد لانو الشوارع كانت مقفلة بس للاسف بعد فشلو يفرقونا بالبونبان بدو يضربو رصاص حي ومطاطي وبدا الشباب يصاب ويقع
اول ولد وقع جنبنا كان مضروب رصاصة مطاطية كتمت نفسو وبدا يستفرغ دم والناس دخلت في هلع شديد فبدت الناس الواعية تهدى ف الوضع
ف اللحظة ديك جنب البيت الكنا فيهو انا شفتا باب فاتح بتاع غرفة طرفية كدا فجريت دخلتا لقيت كنب كمية مرصوص فكوركتا ليهم تعالو دخلوهو هنا
اول مادخلو وبدو يسعفو فيهو فتحنا شنطنا وطلعنا كل الادوات بتاعت الاسعافات المعانا بس لما احتاج يفتحو ليهو فتحة يتنفس بيها مالقينا مقص فاصطرينا جبنا سكين للاطباء الكانو موجودين وبسعفو فيه 😣 فجاة جابو ولد تانى مصاب في كتفو برصاصة
الغرفة ف دقايق اتحولت لدم
بعد ما عملو للاولاد كل المطلوب بقينا نفتش ف عربية عشان يطلعو المستشفى والوضع برا كعب كعب كعععععب بس الاولاد ديل قوو قلوبهم وطلعوهم ودوهم العربية وجو راجعين
طوالي قررنا انو الغرفة دي تبقى غرفة طوارى وبدينا نغسل ف الدموم من الارض وجهزناها للاصابات
خلال ساعة واحدة جاتنا اكتر من سبعة اصابات مختلفة درجة خطورتها بس الاطباء كانو قدر المتوقع منهم واكتر

يلا ف الحالة المنها وحصلت لينا المداهمة الوضع جاط شديد وبقي كعب والابواب بقت تتفتح وتتقفل والناس صوتها بقي عالي، وعرفنا الكلام دا حيجيب لينا مصيبة لانو الناس الجو شايلين الحالة الاخيرة كانو كتار بطريقة مبالغ فيها وماقدرنا نطلعهم ولانسيطر عليهم ونخليهم يسكتو
واحدة من الطبيبات ركبت في الكنبة وبقت تقول ليهم اسكتوو حتكتلونا هنا اسكتو وماف زول بسمع ف كلامها
فجاة سمعنا صوت طااااااخ والعبوة بتاعت البونبان وقعت لينا تحت تربيزة المصاب والناس بدت تصرخ وتقول بونبان اطلعو، اتوجهنا للباب التانى بس للاسف فكو لينا عبوة تانية في مساحة غرفة وربع (انا مهما احكى الكان حاصل مااظن ف زول حيفهمو ويحسو 💔)
الناس كلها بقت تتدافع في الباب والاولاد المعانا رفضو يخلو البنات يطلعو لانو اقل شي كانو حيتضربو رصاص
انا فجاة قلبي قال لي ي اسيل الموت وااااحد كان دا يومك موتي بكرامة فجريت براااى طلعتا بالباب التاني الفاتح ف الشارع (الغرفة هى زي دكان عندو باب فاتح ف ناصية الميدان وباب ف الميدان) انا جريت لي باب الناصية وشايفة التاتشر قدامى والعسكرى بضرب رصاص من كلاش
اووول ماطلعتا استلموني ف الارض
اتضربتا كل انواع الضرب شلاليت وبالسيطان وبونج ف عيونى
اتشتمتا وكانو بقولو لي يا ش...... عاملين غرفة طوارى موش ويضربو ويضربو انا كانو بضربو فينى ستة وعارفين انو نحنا عاملين غرفة طوارى
وشالونى شيل ركبونى التاتشر، وجابو ولد تانى بقينا انا وهو بس والتاتشر كلو بضرب فينا
سبحاااان الله كل الناس الكانت جوة ماف زول طلع معاى الا الولد دا وطلعو بالباب التانى حق الميدان و اعتقلوهم جماعى
ف التاتشر انا والولد رقدونا ع ضهرنا حتى دقونا، كل لفظ سي نحنا سمعناه وكل انواع التهديد بالاغتصاب والسجن وغيرو، نحنا اكتر من ساعة واقفين يضربو فينا ضرب غل، واحد فيهم كان بركب فوق ف التاتشر حتى يقع للولد المعاى في رقبتو
ف النهااااية بعد عملو فينا العملو ودونا الاوسط

الحصل يوم الخميس كان ضريبة وطن، كل علامة ف جسمى انا فخورة بيها وذادتنى يقين وقوة واصرار كل لفظ سي اتجاهي واتجاه اسرتي وزوجي ذادنى تمسك بقضيتى
البلد دي حقتنا وحنقلعا منهم وقريب دا
لا الضرب لا الاعتقال لا اى شي ما حيخوفنا منكم، انتو جبناء والدليل انكم بتتلمو فينا بي سلاحكم ونحنا عزل

الله يرحم موتانا ويشفي المصابين ونحنا الشدااااد ولضاض ديل ماعندنا لغة نتفاهم بيها معاهم غير الشارع دا

احد أفراد الشرطة السودانية يطلق الرصاص الحي علي المواطنيين العزل وزميله يمنعه من ذلك ورغم ذلك بطلق الرصاص الحي علي المتظاهرين السلميين والفيديو تم إهداءه للناطق الرسمي باسم شرطة السودان التي تحمي الفساد

Share on Google Plus

عن المدون gazalysidewalk.com

هنا نبذة عن المدون ""