ديسمبر نجمة نورا شلعت ضوت
لهبا حارق
عتمة كل القبح الكيزانى العشش فى اركان البلد الطيبة
فسادا بجهوية معطون فى عنصرية وتمكين للآفكار الشيطانية
وقلة ادبا عنوانا لخطابهم سرقة ونهبا فعلهم يوماتى
من اكبرهم تبت يداها عمر البشير
والآصنام
طاغوتهم على عثمان مناتهم نافع الحس كوعك
وهبلهم عوض الجاز حرامى البترول ومهندس قتل الناس
كمان جنجويد الغفلة حميدتى من
عر للقصر الجمهورى واصبح صاحب كلمة وشورى
وكمان ليهو قرار
بعد ما الصالح العام طال الشرفاء الشطار
دحين كيف تمشى بلدنا بالعوج المذكور فوق دا
كيف فاقد تربوى وعاطل فكرى يدير سودان
دحين كيف نسكت وما نتكلم كيف نبلع كل الذل
لا والله ما ساكتين
الدمازين كانت احلى بداية طلع من شوارعها الاذان الاول حى على الثورة
قلعت توب الخوف العارى ولبست صوت الحق الصايح تسقط ياكيزان
كان رجع صداها فى كل السودان تسقط كل حبال الكذب الواهنة
وعطبرة اروع من قصة اتيمم كل الناس وفرشوا الساحات بروشا غضبا
ونادوا صلاة الثورة قيام جهرية اصطفوا واعدلوا روحكم شرقت شرقت
ناس بربر والعبيديه دامر المجذوب كريمى عدلوا ارواحهم فى الصف
دنقلا كانت فى الصف الاول المتمة لحقت ليها مكان
القضارف كانت مواجهة القبلة عديل كان الكفار ببنادق ورصاص وبى اوامر
قوش
ضربوا الناس رصاص فى تكبيرة الاحرام
بورتسودان قالت ولا الضالين
كانت امين فى الخرطوم بحرابيض وجزيرتا ابا هناك كان اطفالنا
كان شوفي الصادق إسحق 12 عاما
ومعاهو رفيقوا محمد إسماعيل الكيك 16 عاما ماكان بيلعبوا بى بلاى استشن
كان فى يدهم لجام يقود الركب
كانت
قلوبهم اكبر اكبر من رصاص القدر تاهت جوها الرصاصات
كانت صد عن كل الشعب اتوضت بدمهم الثورة وكبرت
وزحفت حناجر صارخة يسقط يسقط حكم العسكر
تسقط تجارة الدين البايرة
ربك
كردفان الابيض واب دكنه رهدا النهود
فى دارفور يوميا ثورة وكمان ماساءة بفعل الكيزان
والعسكر وجنجويد السجم اللاخلاقى لازم تخلص كل ماسى بلدنا
ونخليها سمحة وقتين يحس كل واحد فينا انه الناس اخوان فى الوطنية
وقتين تبقى الانسانية سلوك
فى جبال النوبة الجرح نازف يوماتى من 56 وكمان فى النيل الازرق
لازم نجتث اسبابه بانسانية ما بى كلاما معسول من فوق منبر
او فى عمود بجريدة او فى ساعة انتخابات وتفوت
كرامة وعزة ثورتنا ابدا ما ثورة جوع حدها
اجتثاث للعوج الصار ممهور باسم الله
ما فيها مكان لآى مهادن للطاغوت
او خطاب للتخذيل
او داعى لهبوطا ناعم شان ينتج
تأنى القبح فى شكلا اخر
الشارع متقدم خطوات ضوئية
وماسك فى يدوأ زمام الدفة
سقفه التغير الجذرى ما ترقيع للبالى
ثورة تأسس دولة ما تنتج تأنى اقطاعيات صفوية
او جهوية كانت ولا طائفية او لابسة جلابية الدين الكذابة
ثورة تحدى تبنى وطنا يسع الكل بحرية وانسانية فسيحة
مامحدودة و مربوطة بموقف أنىء
لازم تبقى الانسانية سلوك لازم تبقى الانسانية سلوك يوماتى
21/12/2018