طلع الهتاف واحد نغمة احلى من نسمة دقش
فى هجير الظلم الفرش مساحات البلد جحيم من 30 سنة
ولسع عايز يزيد فى فصول المسخرة
كفاية كذب وفهلوة تسقط عصابة الدقون المجرمة
يا اخوانا المروق فرض للقادر يجدع هتاف
هتافك يولع نار يحرق خطاب زيف منتشر
مغلف بالدجل والشعوذة الشينة قالوا من ربنا
وكان فى سمح بسيط قالوا هم جايبنوا ما ربنا
هتاقك ياولد ويابت قوية دغرية
يكسر قلب كوز منتفع جاى من قعر الفقر
خمش مخلوع من خيرات البلد
وكنز فى ماليزيا وحتات ما بنعرفا
بعد ما شبع سحت اترع سخافة وعنجها
عرس تلاته وقام يعير فينا يا غجر
الحس كوعك وما تعترض
نحن شجرتنا شاربا من موية الخلود ما تقدر تقلعا
شاذ افاق علمناك تأكل هوت دوغ وبيتزا وتترعا
اجدع هتاف وقول عشانك يا بلد مرقنا الدقش
عشان الغبش
شأن نشيل البلد من يد الحرامية الكتار
الدقونم مطلوقة تنهب بى جشع
و رصاصم ما هو فارز شافع من كبير
تسقط عصابة المسخرة تسقط دقون المهزلة
رغم الرصاص وبنبان الفرفره
الهتاف لازم يوصل سقف السماء
كفاية يا فرعون كذب ورقيص فوق جماجم الآبرياء
خطابك بليد مكرر من 30 سنة
ما عندك جديد للمعضلة
تسقط تغور للمحكمة وبعديها تسكن فى المزبلة
اجدع هتاف تهدم اركان العنصرة
الدنست معانى الآنسنة
فرزت الناس شرق وغرب وعبيد فى زمان العولمة
شوفوا افكار القرون المظلمة قاعدة تحكم فى البلد بالفهلوة
لازم تغور تسقط عصابة السجم الدقون المسخرة
يا اخوانا المروق فرض شأن
بكره البلد تخضر سنبلة
ويلقى اطفالنا الدواء
وتبقى المدارس ليهم ملاذ
ما السوق وصندوق الورنيش
والفوطه والشمس التلفح جلودهم تحرقا
2/1/2018
0 comments:
إرسال تعليق