تجمع المهنيين السودانيين ليه التغيير ؟

نظرتنا كشباب للتغيير شنو وليه بنطالب بيه وبندفع ارواحنا عشانو؟ ليه قررنا نواصل درب التغيير بعد اربعة شهور من بدايتو وما رضينا نكسر الحنك؟ هل عشان في شهداء ضحو بارواحهم؟ عشان معتقلين؟
كلها محفزات لكن في حاجة في نفسنا وفي نفس كل زول بقرا حاليا في البوست ده كان ثاير او محايد، قناعة دافعانا للافضل وقناعة راسخة جوانا انو الافضل ده مابجي بمؤتمر وطني، ما بجي بالشلة الحاكمانا دي. قناعتنا دي هم الما فاهمنها وبحاولو يثنونا عن هدفنا بشارع نيل ووظايف تافهة.

ناخد امثلة عن التغيير الدايرنو والساعين ليهو، بعد كل مثال اكيد حتاخد وقفة تأمل في التلتين سنة الضاعت بسببهم، الكان ممكن يحصل فيها، لكن اكيد بكرة احسن وافضل.

التغيير في التعليم: ما حنتكلم عن السلم التعليمي ولا التعليم البقروش، همنا اكبر لمن نعاين لناس قدرنا في العمر مالقو فرصتهم في التعليم بسبب الحوجة وعشان المدرسة والكراس والكتاب بقروش، لمن نلقى طفل بغسل في عربية بدل يكون في حصة، البخلي المدرسة عشان قروش الفطور، عشان ديل وعشان اخوانا الصغار طالعين.

التغيير في العمل: ده حدث ولاحرج من ابهاتنا البين يوم وليلة قال ليهم الزمو بيوتكم لانكم ما كيزان، والكوز البعرف والما بعرف بشتغل والشهادتو حقت بيطرة شغال في المعادن، لحد نحنا الاسي معدنا قعاد من حيطة لعمود وشغل يومية عشان المصاريف، والشهادات امهاتنا يعاينن ليها والحسرة قاتلاهن. الحلم بتطبيق مشروع التخرج على أرض الواقع الاتبخر، التفكير الاتقهقر من كان اسرة وبيت نتلما فيهو ومستقبل في وطن شاسع لتفكير في كيف نجازف حق القميص.

التغيير في الصحة: بحكم اعمارنا امراضنا ما كتيرة والا كنا زيادة اعباءة على اهلنا، ومابننسى اصحاب الامراض المزمنة البنشوف دموعهم لانو ما قادرين على فحص، حلمنا في صحة مجانية ونظام صحي كويس حاولنا نصلحو في مجهودات فردية من الاطباء وشير من هنا وهناك لحد ماوصلناه لمنظمات قومناها برانا وبمجهوداتنا، ولمن وصلنا لقناعة مافي نظام صحي كويس في وجود بياعين المستشفيات ديل. ملو السجون بي الناس البساعدو المرضى وكانو متحملين وشايلين شغل وزارة الصحة.

القايمة بتاعت احلامنا البدينا نشتغل عليها ونترجمها لواقع بالمواكب والوقفات والاضرابات كبيرة وكتيرة وبوست واحد ما بكفيها والوجع راقد، فلو واحدة من الحاجات دي لامستك وحبيت تغيرها انت وقعت على اعلان الحرية والتغيير، ما ضروري تكون مهني، ضروري تكون عندك ضمير صاحي، ايدينا مع بعض وايدينا للبلد.

اذا الكلام ده بمثلك وبحكي عنك فانت مشارك في التغيير بالدعاء، بالتوجيه، واعظمها بالتواجد في الشارع. واذا ما بمثلك اتحسس ضميرك وصحيهو وبتلقانا منتظرنك.

#حنبنيهو

Share on Google Plus

عن المدون gazalysidewalk.com

هنا نبذة عن المدون ""