يا بلد باكر عوافى ونفرح اضافى
لا بيوت اشباح لا منافى
لا كيزان تكذب تنافق
تكتل شفعنا فى هيبان وتحرق فى قطا طينا
وتكفر فى اعتقادنا برب الخلائق
بكره يا بلد عوافى ونفرح اضافى
لا دقون تكتل فى المناصير شفع مدارس
وتحرق فى جبل مرة وفى تابت
بكره يا بلد عوافى ونفرح اضافى
لا كيزان تنهب تغش
تتوضى بدم الضحايا
وتطلع فوق فى المنابر
تخطب تنافق تقول لا لدنيا قد عملنا
وتمشى تغتصب الحرائر وفى يديم كلاشة
وجنجويدهم أيجار ارتزاق بنفاق
عشان القرش اليرارى مختوم بدم الضحايا
دينك القروش يا كوز كنت مقروش فقر
فيك رزايل الدنيا كوم
ما خليت مجالا للناس ليك تسامح
مليانين غبائن ما ليها فش
30 سنة الناس تصبح مغبونة من فعل قبيح
وتمسأ ممحونة من كذبا رخيص
اها يا كوز دى وقت الحساب بقانون وعدالة
ارجا وما تضارى
فعلك المفضوح قباحة
ماك ساتروا لو طرزت الكون ستاير
ياهو صارخ رغم الستاير
ما تكتر بكاء وتقول اقصونى من بكره القريب
ما انت اقصيت ببنادق وبسجون
وفى بيوت اشباح كتلت
ومن جيوب الناس نهبت
زندية وعنترية وبندقيه
تصفى فى خلق الله زى تدخين السجاير
ياهو عملك الاقصاك من عقول غلابة
ما بتعرف حقد زى عما يلك
يا بلد باكر عوافى
تبقى افرحنا فارشة ورد الشوارع
وتعزف كمنجه بلحن انسانية
بدل عزف البنادق داك النشاز
الحرقت وحرقت
يابلد باكر عوافى ونفرح اضافى
لفرح كنداكة بزفة البلد الكبيره
لمدنية راسخة مسنودة بانسانية
14-3-2019
0 comments:
إرسال تعليق