لما ارسم بحروف الشوق غنوة فيها عشقا ليك يانخلة
نور يشع ضد العتمة القبيحة
وفى مسارات الصدق خطوة
ولما اكتب فى السحاب غنوة بلون الحلم الجميل
وبى شموع بكره فينا
تبقى لوحة فى عمرى المشتت
فى المشاوير الرمادية
والمحطات الاضطرارية
والمنافى الاجبارية
لوحة فيها دهشة ومستحيل وممكن
فيها اشياء من تقاصيل الحكايات القديمة
فيها ابعادا كتير
فرحة
رقصة فى موجة عاتية
كاسرة قيد الزيف المجمل
بدقون ونظرية فى شكل العبث
مهزلة شلعت حوش البيت الكبير
بقى خرطة مشوهه قبيحة
فيها اكتر من شرخ
واعمق كم جرح
فيها هتاف من حناجر مدن مقصية
صايحة فجرا فجرا سلام يابلد سلام يا بلد
دار ابوك خربوها الكيزان لملم عيدانا ياولد
وابنيها تانى صاح
دمك يا شهيد نبت غضب
قام هتاف
كفنك يابطل علم
نشيدك يا ولد شعار
تغنيك كل البلد
تزغرد ليك كل البنيات
شبالك من كل الجميلات
وتحننك كل الامات
ووزيرك يا عريس شعب غاضب
غنوة فيها عشقا ليك يانخلة
فيها شوقا ليك يانخلة
فيها وردا ليك يا روعة
فيها حبا ليك يا غالية
بحبك يا احلى نسمة
يااغلى نخلة
بلا حدود بلا قيود
بلا قبحا مجمل
بشفافية وصدق
وعمقا كبير
16/1/2012